ឡូយមែន LeSyvrac ជាកង់មាន RAM ដល់ទៅ 4GB ហើយឆ្លាតមិនធម្មតា!

វិស័យជិះកង់នាពេលបច្ចុប្បន្ន បានកំពុងបោះជំហ៊ាន ឈានទៅមុខជារៀងរាល់ថ្ងៃ ដោយពីមួយថ្ងៃទៅមួយថ្ងៃ យើងសង្កេតឃើញថាមានប្រជាជនកម្ពុជាច្រើនបានជ្រើសរើសយកកង់ធ្វើជា យាន្តជំនិះដ៏ប្រពៃមួយ ដែលអ្នក ខ្លះពួកគាត់ជិះកដង់ដើម្បីហ្វឹកហាត់ខ្លួនឲ្យខ្លាំងដើម្បីចូលប្រណាំង ហើយខ្លះជិះកង់ដើម្បីហាត់ប្រាណ ហើយខ្លះទៀតជិះកង់ដើម្បីដើរកំសាន្តនៅតាមតំបន់ៗនានាទាំងក្នុងប្រទេស និងក្រៅប្រទេសខ្លះៗផងដែរ។ កាលនិយាយដល់រឿងកង់នេះ យើងបានប្រទះឃើញកង់ឆ្លាតវ័យមួយ ដែលទើបនឹងបង្កើតបានជាផ្លែផ្កាកាលពីពេលថ្មីៗកន្លងទៅរបស់ប្រទេសចិន ដែលវាមានឈ្មោះថា LeEco LeSyvrac ជាកង់ឆ្លាត មានរូបរាងស្រស់ស្អាត និងមានច្រើនជម្រើសម្រាប់សាច់ប្រាក់របស់អ្នកទិញយកទៅជិះ។

ដូចរូបភាពខាងលើនេះអញ្ចឹង LeSyvrac ជាកង់ឆ្លាតមានរូបរាងទាក់ទាញ ហេតុអ្វីបានជាយើងហៅវាថា ជាកង់ឆ្លាត? នោះក៏ដោយសារតែកង់នេះបានបំពាក់មកជាមួយនឹងស្មាតហ្វូនជាប់មកជាមួយនឹង តួកង់មិនអាចដោះចេញបាន បំពាក់មកជាមួយប៊ូតុងស្កេនក្រយៅដៃ ប្រើប្រាស់សេវា 4G LTE បាន ដែលដំណើរការដោយ Android ចំនួន 1 គ្រឿងទំហំ 4 អ៊ីញ មាន CPU ជាប្រភេទ Quad-Core ល្បឿន 1.3GHz និង RAM ដល់ទៅ 4GB នៅលើកកង់ខាងមុខ ដែលវាមានមុខងារពិសេសៗជាច្រើនសម្រាប់អ្នកជិះកង់នេះ បញ្ជាទៅលើមុខងារនានារបស់កង់ ដូចជាបើកភ្លើងមុខក្រោយ ចាក់តន្ត្រី ទទួលការ Call ឬហៅចេញទៅខាងក្រៅ ទទួលសារ មើលផែនទី ពិនិត្យមើលចំងាយអ្នកបានជិះ វាស់ចង្វាក់បេះដូងជាដើម ដោយប្រើប្រាស់សេនស័រនៅដៃកាន់ខាងស្ដាំ (សូមមើលវីដេអូ) និងមុខងារជាច្រើនផ្សេងទៀត ដោយការបញ្ជាគឺចុចទៅលើអេក្រង់របស់ទូរស័ព្ទ និងប៊ូតុងដែលមានបំពាក់រួចជាស្រេចនៅលើដៃកង់ទាំងសងខាង។

កង់នេះក៏មានសុវត្ថិភាពខ្ពស់ក្នុងការការពារមិនឲ្យមាននរណាជិះក្រៅពីម្ចាស់ ដោយធ្វើការចាក់សោកង់ មិនឲ្យកង់ទាំង 2 វិលបានឡើយ ដែលវាល្អបំផុតសម្រាប់ការពារចោរលួចនៅពេលយើងមិននៅក្បែកង់ជាដើម ដោយចុចប៊ូតុង P ដូចរូបខាងក្រោម នៅលើតួរកង់ជាការស្រេច ឬចុចប៊ូតុងភ្លើងពីក្រោមនោះ ដើម្បីបើកភ្លើង និងប៊ូតុងកាមេរ៉ាសម្រាប់ថតពេលធ្វើដំណើរម្ដងៗជាដើម។ អ្នកអាចនឹងឆ្ងល់ថា បើកង់មានបំពាក់មកជាមួយស្មាតហ្វូន និងប៊ូតុងច្រើន ហើយមានទាំងភ្លើងមុខក្រោយដូចម៉ូតូអញ្ចឹង តើវាបានភ្លើងមកពីណាដើម្បីផ្គត់ផ្គង់? ជាការពិតណាស់ កង់នេះមានអាគុយអាចសាកថ្មបានរាល់ពេលអ្នកជិះកង់ ហើយវាប្រើប្រាស់ភ្លើងក្នុងអាគុយនោះដើម្បីផ្គង់ផ្គង់ទៅលើផ្នែកសំខាន់ៗខាងលើ។

និយាយអំពីការបញ្ជាជិះវិញកង់នេះមានឡីបខាងមុខចំនួន 3 និងខាងក្រោយចំនួន 9 និងមានហ្វ្រាំងប្រេង ងាយស្រួលចាប់ និងបញ្ជាទៅតាមកាលៈទេសៈផ្លូវ។ កង់នេះល្អបំផុតសម្រាប់ជិះនៅក្នុងទីក្រុង ឬលើផ្លូវរាបស្មើ មិនមែនសម្រាប់ជិះលើផ្លូវ Off Road រលាក់ មានដីហ៊ុយច្រើននោះទេ តែអ្នកក៏អាចជិះបានដែរ គ្រាន់តែសំបកកង់ និងតួកង់មិនសមនឹងជិះផ្លូវបែបនោះប៉ុណ្ណោះ។ Le Syvrac មានលក់នៅក្នុងប្រទេសចិនហើយក្នុងតម្លៃជាប់ពី 800$ ឡើងទៅដល់ 6000$ ទៅតាមសមត្ថភាពគ្រឿងកង់ និងតួរបស់វាជាប្រភេទដេរ៉ា ឬជាប្រភេទកាបោន (Carbon) ជាដើម។