អ្នកវិទ្យាសាស្ត្ររកឃើញថា ទឹកដោះកន្លាត មានជីវជាតិចិញ្ចឹម ច្រើនជាងទឹកដោះគោ 4 ដងឯណោះ

កន្លាត គឺជាសត្វល្អិត ដ៏គួរអោយខ្ពើមរអើមមួយ ដែលមនុស្សមិនហ៊ានទាំងនៅជិតផង មិនចាំបាច់អីដល់ចាប់កាន់ វានោះទេ ក៏ប៉ុន្តែដោយយោងទៅតាម ការរកឃើញ របស់អ្នកវិទ្យាសាស្ត្រ នៅពេលថ្មីៗនេះ នឹងធ្វើអោយអ្នកស្អប់កន្លាត កាន់តែព្រឺសម្បុរថែមទៀត។ នៅក្នុងលទ្ធផលសិក្សាស្រាវជ្រាវ របស់ក្រុមអ្នកវិទ្យាសាស្ត្រមួយក្រុម បានបង្ហាញអោយឃើញថា ទឹកដោះកន្លាត វាពោរពេញទៅដោយ កម្រិត កាឡូរី ប្រតូអ៊ីន និងសារធាតុចិញ្ចឹមយ៉ាងច្រើន រហូតដល់ទៅ 4 ដងឯណោះ ច្រើនជាងទឹកដោះគោ ហើយវាពិតជាអាហារដ៏ល្អ បំផុតសម្រាប់មនុស្សយើង។

កន្លាតដែលអាចផ្តល់ទឹកដោះ បានដ៏ល្អនេះ មិនមែនជាកន្លាតដែលនៅតាម គេហដ្ឋានរបស់យើងនោះទេ ពោលវាជាកន្លាត ប្រភេទ Diploptera punctate ដែលភាគច្រើន ពួកវារស់នៅតាមព្រៃ និងតាមចម្ការជាដើម។ ការចិញ្ចឹមកូន របស់កន្លាតប្រភេទនេះ វាប្លែកពីកន្លាតធម្មតាយើងត្រង់ថា វាដើរបញ្ចុកទឹកដោះ វាទៅតាមរន្ធស៊ុតតូចៗ ដើម្បីអោយកូនវា អាចរីកចម្រើនបានល្អ រហូតដល់អាចចេញពីសំបុកបាន។ សារធាតុផ្សំ ក្នុងទឹកដោះរបស់វា គឺមិនខុសគ្នាអ្វីពី ទឹកដោះធម្មតានោះទេ ពោលមានជាតិខ្លាញ់ ស្ករ ប្រូតេអ៊ីន និង អាស៊ីតអាមីណូ ដែលល្អសម្រាប់ការ រីកលូតលាស់ជាដើម។ ការរុករកឃើញនេះ អាចជាដំណោះស្រាយ ថ្មីមួយ ដែលឆ្លើយតបទៅនឹងបញ្ហា កង្វះខាតអាហាររូបត្ថម្ភ ក៏ប៉ុន្តែសម្រាប់អ្នកដែល ស្អប់សត្វល្អិតដូចជាកន្លាតនេះវិញ ប្រាកដជាមិនពេញចិត្តនោះទេ។

មានចំណាប់អារម្មណ៍យ៉ាងណាដែរ ចំពោះរបកគំហើញថ្មីមួយនេះ? យើងជឿថា អ្នកអាចនឹងច្រឡំបាន ថាគេនឹងយកទឹកដោះ របស់សត្វកន្លាត ប្រភេទដែលរស់នៅតាម ផ្ទះបាយ និងបន្ទាប់ទឹកយើងនោះ ក៏ប៉ុន្តែវាមិនមែននោះទេ។ ជាក់ស្តែងនេះជាកន្លាត ដែលនៅតាមព្រៃ និងនៅខាងក្រៅផ្ទះ ដែលពួកវាមិនសូវមានមេរោគនោះទេ ផ្ទុយទៅវិញវាក៏សំបូរទៅដោយសារធាតុចិញ្ចឹមជាច្រើន ហើយថែមទាំងមិនមានក្លិន អាក្រក់ទៀតផង។